Cadavéu, 16 d'agostu
El viniente día 10 d'agostu va tener llugar na población de Cadavéu (Valdés) la tercer xornada de les ocho que componen el programa Súbite a la Tenobiera, entamáu pola compañía profesional d'espectáculos asturiana Producciones Nun Tris.
Trátase d'unes xornaes onde siendo los conxuntos d'horros, o unidaes singulares de los mesmos los protagonistes, van plantegase actividaes culturales de bien estremáu calter pero que vienen destacar la importancia qu'estes icóniques edificaciones tienen pa la sociedá asturiana. N'esi sen, va haber charres, presentaciones, visites guiaes, teatru, música, o esposiciones en caúna de les sedes, colo qu'amás d’apurrir un calter específicu a cada convocatoria, preténdese dinamizar de dalguna forma la vida cultural de cada allugamientu, collaborando con estremaes persones, asociaciones o entidaes. Nesti casu ye solliñable la collaboración cola Asociación de ,Amigos del Hórreo, que van ser una vez más responsables de la visita guiada, y cola Sociedad Popular La Regalina, que coordinará actuaciones d'artistes llocales y la degustación de Rapa.
- 16:00h Visita guiada al conxuntu d'horros de Cadavéu, cola collaboración de l'Asociación de Amigos del Hórreo. Inclúi: animación teatral, llectura de poemes, bandina de música tradicional y conciertu coral.
- 18:00h Demostración y preba de rapa.
- 19:00h Espectáculu Hacer o Facer, de Los Pintores Teatro
Toles actividaes tan dirixíes a tolos públicos y tienen calter gratuitu
D'esta miente, el programa Súbite a la Tenobiera va visitar, amás de Navelgas, onde yá se cellebró con anterioridá, y Espinaréu, les poblaciones de Samartín d’Oscos. Sietes (Villaviciosa), Uriés (Ayer), El Valle de Carreño y Güeñu (La Ribera).
El proyectu Súbite a la Tenobiera esfruta d'una ayuda de la Conseyería de Cultura a proyectos singulares nel ámbitu rural pa la so puesta en marcha.